پنجاب میں ڈینگی مرض کے خلاف غیر موثر اقدام

پنجاب میں ڈینگی مرض کے خلاف غیر موثر اقدامات عدالت میں چیلنج

پنجاب میں ڈینگی کے خلاف موثر اقدامات نہ اٹھانے کو لاہور ہائیکورٹ میں چیلنج کر دیا گیا ہے۔

نوشاب احمد ایڈووکیٹ نے درخواست میں موقف اختیار کیا ہے کہ حکومت نے ڈینگی کا سبب بننے والے مچھر کے خاتمے کے لیے مناسب انتظامات نہیں کئے جس سے یہ مرض وباء کی شکل اختیار کر گیا۔ درخواست میں کہا گیا ہے کہ اس مقصد کے لیے کیا گیا سپرے بھی غیر معیاری ہے اور سیکرٹری صحت اسکے ذمہ دار ہیں ۔

لاہور میں ڈینگی کی دہشت، مریضوں کی تعداد 1500 سے زائد ہو گئی

ڈینگی مچھر نے لاہور میں دہشت پھیلا دی ہے ، شہر میں مریضوں کی تعداد پندرہ سو سے تجاوز کر گئی ،پنجاب حکومت کے ناقص انتظامات کی وجہ سے صوبے بھر میں خوف ہراس میں اضافہ ہو رہا ہے ۔

پنجاب میں گزشتہ چوبیس گھنٹوں کے دوران مزید ایک سو چار کیسز سامنے آنے سے متاثرہ افراد کی تعداد سولہ سو سے بڑھ گئی ہے، جبکہ صرف لاہور میں مریضوں کی تعداد ڈیڑھ ہزار سے بھی تجاز کردی ہے ۔ پنجاب حکومت کی جانب سے حفاظتی مہم اور سپرے کے دعوے کاغذی کارروائی تک محدود ہیں ۔ فیصل آباد کے ہسپتالوں میں اب تک ڈینگی کے تینتیس مریض لائے جا چکے ہیں۔ ذرائع کے مطابق فیصل آباد میں ڈینگی کے مریضوں کی تعداد دو سو سے زائد ہے ۔ راولپنڈی،اسلام آباد کے ہسپتالوں میں گز شتہ چوبیس گھنٹوں میں ڈینگی کے 16 نئے مریض داخل کرائے گئے ہیں جس کے بعد جڑواں شہروں میں ڈینگی کے مریضوں کی تعداد 77 ہو گئی ،جبکہ اب تک دو مریض جاں بحق ہو چکے ہیں ۔ ملتان میں ڈینگی وائرس کا مرض وباء کی شکل اختیار کرنے سے نشتر ہسپتال میں زیر علاج مریضوں کی تعداد تئیس ہو گئی ہے۔ نشتر ہسپتال میں مزید پانچ مریضوں روبینہ ، عمران ،قیصر ، کامران اور عدنان میں ڈینگی وائرس کی تصدیق ہوگئی ہے جس سے ہسپتال میں زیر علاج مریضوں کی تعداد تیئیس ہو گئی ہے ۔ مریضوں کی تعداد میں مسلسل اضافے پر ہسپتال انتظامیہ نے وارڈ نمبر ستائیس کو ڈینگی کے مریضوں کیلئے مختص کر دیا ہے تاہم پلیٹ لیٹس کٹس کی کمی کے باعث مریضوں کو مشکلات کا سامنا ہے ۔

پنجاب میں ڈینگی بخار خوفناک صورت اختیار کرگیا

Last Updated On 07 September,2011

پنجاب میں ڈینگی بخار خوفناک صورت اختیار کر گیا ہے،لاہور میں روازانہ سو کے قریب نئے مریض ہسپتالوں میں داخل ہو رہے ہیں۔

آج ایک ہی دن میں مزید ایک سو بیالیس نئے مریض سامنے آ گئے جس کے بعد پنجاب میں مریضوں کی تعدا دو ہزار کے قریب پہنچ گئی ہے،سندھ میں ڈینگی کے متاثرہ افراد کی تعداد ایک سو پچہتر تک جا پہنچی ہے۔ لاہور میں ڈینگی بخار تیزی سے پھیلنا شروع ہو گیا ہے، اب تک لاہور میں ڈینگی کے 1772 کیسز سامنے آئے ہیں۔ گزشتہ چوبیس گھنٹوں کے دوران لاہور میں ایک سو بیالیس کیس سامنے آنے کے بعد پنجاب میں ڈینگی کے مریضوں کی تعداد انیس سو اٹھاون ہو گئی ہے۔ میو ہسپتال لاہور میں 32، سروسز ہسپتال میں 7، گنگا رام میں2 جناح ہسپتال میں 4، شیخ زید ہسپتال میں 9 ، پنجاب انسٹی ٹیوٹ آف کارڈیالوجی میں 3، پرائیویٹ ہسپتالوں میں36 اور انسٹی ٹیوٹ آف پبلک ہیلتھ میں 49 مریض داخل کرائے گئے۔ پنجاب حکومت لاہور میں ڈینگی وائرس پر قابو پانے پر قطعی ناکام ہو چکی ہے جس کے باعث لوگوں میں مسلسل خوف و ہراس پھیل رہا ہے۔ لاہور کے تقریبا ہر علاقے میں ڈینگی کے مریض سامنے آرہے ہیں۔ سرکاری ہسپتالوں میں بیڈ کم پڑ گئے ہیں۔ ہسپتالوں میں مریضوں کا کوئی پرسان حال نہیں، ڈینگی سے بچاؤ کے اسپرے کا دور دورتک نام نہیں۔ جڑواں شہروں راولپنڈی اور اسلام آباد میں بھی ڈینگی سے متاثرہ مریضوں کی تعداد100 سے تجاوز کر گئی ہے۔ ملتان میں بھی ڈینگی بخار کے مریضوں میں مسلسل اضافہ ہو رہا ہے۔ نشتر ہسپتال میں لائے گئے ڈینگی بخار کے مریضوں کی تعداد 25 ہو گئی ہے۔ خیبر پختونخوا میں انچاس افراد میں ڈینگی وائرس کی تصدیق ہو ئی ہے جو مختلف ہسپتالوں میں زیر علاج ہیں۔ ادھر سندھ بھر میں ڈینگی سے متاثرہ افراد کی تعداد175 تک جا پہنچی ہے۔ نوشہرو فیروز میں بھی دو افراد میں ڈینگی وائرس کی تصدیق کردی گئی ہے۔ ڈینگی سرویلنس سیل کے جاری کردہ اعداد و شمار کے مطابق گزشتہ دو روز میں کراچی میں مزید 4 افراد میں ڈینگی وائرس کی تصدیق کی گئی ہے ۔ شہر کے مختلف ہسپتالوں میں 8 افراد داخل ہیں،جبکہ مزید 4افراد کو ڈینگی کے شبے میں داخل کر لیا گیا ہے۔